Úrslitin í Söngvakeppninni 2015 ljós!

pizap.com14240824059651Já, þetta var aldeilis fjör á laugardaginn! Gífurlega spennandi einvígi í lokin og mátti vart á milli sjá hvort atriðið myndi bera sigur úr býtum. Núna vitum við að 15.000 atkvæði skildu þau Maríu og Frikka að og við höfum eftir óstaðfestum heimildum að Sunday hafi verið þriðja í úrslitunum. RÚV kemur til með að kynna það á næstunni.

Við veðjuðum á röð þriggja efstu laganna hér í póstunum á undan:

Eyrún: 1. María, 2. Sunday, 3. Friðrik Dór
Hildur:  1. Sunday, 2. Friðrik Dór, 3. María

Hvorug okkar hafði 100% rétt fyrir sér með einvígið en Eyrún giskaði á réttan sigurvegara. Báðar höfðum við þó rétt fyrir okkur með lögin þrjú (þ.e.a.s. ef hinar óstaðfestu heimildir reynast traustar!) og sáttar við það 🙂

könnunÞið, lesendur síðunnar, fenguð líka séns á að spreyta ykkur og voruð ansi nærri lagi – höfðuð einvígið á hreinu og klárlega sigurvegarann! Greinilegt var þó að hin unga Elín Sif heillaði marga áhorfendur því að hún var í 3. sæti hjá lesendum AUJ, og skyldi engan undra. Við hlökkum a.m.k. mikið til að heyra af henni í framtíðinni!

Auglýsingar

SÖNGVAKEPPNI SJÓNVARPSINS 2015: SPÁ HILDUR FYRIR ÚRSLITIN

123Rétt eins og hjá Eyrúnu er fiðringurinn að magnast spennast og fiðringurinn núna þegar úrslitin nálgast með hverjum klukkutímanum. Hér birtir Hildur sína spá fyrir kvöldið:

Keppnin í ár er kannski örlítið óvenjuleg að því leiti að það er ekkert lag af sama meiði að keppa. Það gerir spánna örlítið erfiðari en oft áður þegar hið óvenjulega bætist ofan á mörg góð lög sem keppa. Þar að auki eru umdeildir flytjendur í keppninni í ár, ýmist sem fólk elskar eða elskar að hata innan um minna þekkta listarmenn sem enn eiga eftir að finna sig hjá almenningi. En hefjum leikinn!

Röðun laga:

Það er oft talið að það sé betra að vera fyrr en seinna á svið í júróvision. Það er líklega alveg rétt í stóru keppninni úti þegar 15-25 lög eru að keppa á einu og sama kvöldinu. Ég er ekki eins viss að það skipti höfuð máli þegar kemur að keppninni hér heima þegar eingöngu sjö lög stíga á svið. Það er bara minna að gleyma!  Í ljósi þess og eftir að hafa heyrt ensku útgáfurnar hjá þeim sem það hafa kosið (þó bara í órafmagnaðir útgáfu) þá spái ég því að þrjú efstu sæti fari svona:

3. sæti: María Ólafsdóttir – Unbroken

2. sæti: Friðrik Dór – Once again

1. sæti: SUNDAY – Feathers

Það má þó ekki vanmeta mátt einlægninar og einfaldleikans sem er að finna í laginu hennar Elínar, Dance slow, og gæti hún blandað sér í toppbaráttuna. Þó verðbankar hafi spáð Birni og félögum góðu gengi tel ég litlar líkur á því, um er að ræða sæti í 60. keppni júróvision og ég held að fólkið í landinu og dómnefndir vilji eitthvað meira en klisjukennt ,,ekki grín“. Þó Daníel Óliver eigi eina poppslagarann í keppninni þá tel ég að sviðsetning sé ekki nægilega grípandi til að fleyta þeim áfram ásamt því að það vekur upp hjá mörgum ákveðin kjánahroll að sjá atirðið sem minnir meira á skemmtiatirði á árshátíð en eitthvað sem hentar vel fyrir framan 100 milljónir sjónvarpsáhorfenda. Í lokin tel ég Milljón augnablik horfði hreinlega ekki nægilega vel til áhorfenda ásamt því að sviðsetning og Haukur komu ekki sérlega vel út í sjónvarpið þó hafi verið magnað að sjá þau live í Háskólabíói. 

SÖNGVAKEPPNI SJÓNVARPSINS 2015: SPÁ EYRÚNAR FYRIR ÚRSLITIN!

EyrúnogBonnieHressleikinn og fiðringurinn er farinn að gera viðvart við sig og þá veit maður að Söngvakeppnin er á næsta leiti.Söngvakeppnisdagurinn er alltaf mikið tilhlökkunarefni og loftið byrjað að titra af spenningi, og það er ekki bara eftir að hafa hrist alla skanka í Eurovision-zumba í Reebok Fitness! 🙂 Hér birtist spá Eyrúnar fyrir kvöldið:

Það er alltaf hægt að spá og spekúlera heilmargt í kringum framlögin í Söngvakeppninni og flestir eru sammála um að í ár sé keppnin óvenjusterk. Margir eru kallaðir til og flestir vilja komast alla leið og hafa lagt talsvert á sig, kynnt sig í skólum og þar fram eftir götunum. 

Röðun laga

Fyrsti hluti kosningar er blönduð símakosning og dómnefndarkosning eins og áður hefur verið. Stóri wow-faktorinn hér er að mínu mati að nú þegar hafa lögin verið gefin út í lokaútgáfunni sem gerðist á sviðinu í fyrra og gekk svona la-la fyrir sig. Nú er þetta alvöru og enskar útgáfur þeirra laga sem eiga að vera á ensku hafa verið gefnar út. Þetta þýðir líka að skemmtunin við að sjá lokaútgáfuna á sviðinu í Háskólabíói verður ekki endurtekning frá undankvöldunum (alveg eins). Þetta er áhugavert twist. Svona tel ég að röð þriggja efstu verði:

3. sæti: Friðrik Dór (Once Again)

2. sæti: SUNDAY (Feathers)

1. sæti: María Ólafs (Unbroken)

Þessi fjögur lög; Once Again, Unbroken, Feathers og Dance Slow eru öll hnífjöfn finnst mér á samfélagsmiðlum og í fjölmiðlum ber mjög mikið á þeim öllum. Reyndar líka Birni Jörundi en þegar á hólminn er komið held ég ekki að fólk kjósi hann – samkeppnin um sæti út til Vínar er einfaldlega of hörð. Hér held ég að baklandið skipti mjög miklu máli og hver hefur náð að kynna sig sem best – en ekki síður hvern fólk er tilbúið að kjósa til Vínar og hverjum fólki treystir til að flytja gott lag á pottþéttan hátt.

Gestaálit: Euro-Sigrún

EurosigrúnGestaálitið okkar fyrir Söngvakeppnina að þessu sinni er Sigrún Huld Skúladóttir a.k.a. Euro-Sigrun, leikkona og júrónörd með meiru. Hún hefur farið mikinn á Facebook undanfarið í grúppunni Júróvisjón 2015  þar sem hún hefur alla anga úti og fylgist með hverju því sem tengist Eurovision og Söngvakeppninni. Við höfum öruggar heimildir fyrir því að umfjöllunin hjá henni verði enn meira og hressilegri þegar nær dregur Eurovision!

Nú ætlar hún hins vegar að spá í spilin fyrir annað kvöld:

CADEM – Fyrir alla
„Ok, ok. Ég skil alveg að þetta lag skuli höfða til fólks. Það sker sig úr, er líflegt og svona hoppandi út um allt og tannað. Dass af Skyr.is og dass af „það sést hverjir drekka Egils Kristal“. Fólk er oft skotið í þannig fíling. En þetta nær mér ekki. Ég var ekki hrifin af stúdíóútgáfu lagsins og svo sá ég það í undanúrslitum og það breytti ekki skoðun minni. Daníel er ekki nógu raddsterkur söngvari til að gefa laginu orkuna sem þarf til þess að það nái flugi. Ég er engan veginn að skilja þennan offhvíta 90’s fatnað né “kumpánlegu” danshreyfingarnar á sviðinu. Mér finnst ég hafa heyrt þetta lag allt of oft í gegnum árin og ég á til að bregðast illa við lögum sem segja mér að vera hress. Þau hafa þveröfug áhrif á mig. Hressa þríeykið í CADEM fær þó hrós fyrir líflega framkomu, góðan vilja og sjarma. En þetta er of mikið plast fyrir minn smekk.
Ég hef ekki mikla trú á að þetta lag muni enda ofarlega í úrslitum. Þau eru að auki fyrst á svið og hætta á að slatti af fólki muni missa af þeim. Margir Eurovision aðdáendur erlendis virðast þá afar hrifnir af þessu og fær lagið yfirgnæfandi kosningu á ESC Bubble. Ég mun horfa og hlusta með opnum hug á laugardaginn og er spennt að sjá hvort enski textinn lyfti þessu upp á hærra plan.“

SUNDAY – Fjaðrir
„Töff, spes, flott. Ég er mjög hrifin af þessu lagi og röddin hennar Hildar er svo djúsí. Dísæt og djúp á sama tíma. Lagið hefur andstæður í sér, hið bjarta og dökka einhvern veginn og það er svo heillandi. Ég varð hrifin af þessu lagi um leið og ég heyrði stúdíóútgáfuna og hrifningin jókst þegar ég sá það í undanúrslitum. Textinn er líka alveg frábær. Margir hafa líkt laginu við framlag Noregs til Eurovision 2013, I Feed you My Love með Margaret Berger og get ég alveg tekið undir það að einhverju leyti. En mér finnst þó lagið alveg standa fyrir sínu án þessa samanburðar. Ég varð því fyrir eilitlum vonbrigðum þegar ég sá atriðið í beinni og minnti stílíseringin á Hildi óneitanlega mjög mikið á áðurnefnda Margaret Berger, hárgreiðslan og hvítt aðsniðið dress. Það var engu líkara en að verið væri að reyna að líkjast þessu framlagi Noregs. Ég hefði verið glaðari með það ef Hildur hefði fengið alveg sérstaka stílíseringu, kannski hrafnadress? Öll sviðssetningin var að auki einhvern veginn ófókuseruð og út um allt.
Ég hugsa að þetta lag sé vel staðsett annað á svið og á milli laga sem eru síðri að mínu mati. Staðsetningin mun styrkja stöðu lagsins og gera það eftirminnilegra. Fjaðrir hefur alla burði til að raka inn stigum hjá Eurovision aðdáendum og dómnefndinni en ekki síður hjá þeim sem eru orðnir leiðir á Eurovision klisjum. Ég væri kampakát ef Sunday lentu í einvíginu og tel ekki ólíklegt að það verði einmitt raunin. Ég er get varla beðið eftir að sjá og heyra SUNDAY massa þetta á laugardagskvöldið með enskum texta.“

Björn og félagar – Piltur og stúlka
„Þetta lag er skyndibitinn og innihaldið er „We are the World“, Fíladelfía og Nýdönsk. Innihaldið heillar mig ekki. Textinn er svona við eigum öll að vera vinir, elska hvort annað og vera góð og við erum öll manneskjur og deilum sammanneskjulegum tilfinningum og þannig. Rosa fínt og allt það. Ég fíla góðan friðarboðskap bara eins og næsti Eurovision nöttari en þessi skýtur yfir markið. Textinn er svo mikið að messa yfir manni og þess vegna fæ ég svona trúarlegan fíling. Augun poppuðu næstum úr hausnum á mér í undanúrslitunum ég ranghvolfdi þeim svo mikið. Þrátt fyrir alla þessa svakalegu neikvæðni hjá mér vil ég samt gefa flytjendunum fjórum hrós fyrir samstillta og orkumikla framkomu. Þau fúnkera vel saman og eru fagmenn fram í fingurgóma. Stílísering og sviðssetning var einnig til fyrirmyndar en það dugði ekki til að bjarga þessu lagi. Ég veit þó fyrir víst að margir eru hrifnir af þessu og ber ég fulla virðingu fyrir því. En þetta nær mér ekki einu sinni örlítið.
Staðsetning Björns og félaga er nokkuð góð, beint á eftir Fjöðrum. Ég hugsa neflilega að aðdáendur þessa lags séu ekkert sérlega hrifnir af laginu á undan og öfugt. Þessir tveir hópar svissa líklega pissupásum. Hentugt í Eurovision partýinu!“

María Ólafs – Lítil skref
„Þessi sjarmablossi kom algerlega aftan að mér í undanúrslitunum. Ég var alls ekki hrifin af þessu lagi í stúdíóútgáfunni og er enn ekkert sérlega hrifin af því. En María kom sá og massaði dæmið! Hún var bara svo flott að hún náði mér og ég lá kylliflöt. Hún er örlítið tæp á lágu nótunum en maður gleymir því um leið og hún kýlir fast á háu nóturnar. María ber þetta lag alla leið og lagið á allt henni að þakka. Að því sögðu þá skil ég samt sem áður engan veginn hvaðan pælingarnar á bakvið stílíseringuna og sviðssetninguna koma. Umgjörð virðist ekkert vera í takt við lagið. Þetta blómálfa og Emmelie de Forest lúkk er í hrópandi mótsögn við girl-powerið í laginu. Vá hvað það væri hægt að gera mikið með það! Hún tekur loks ákvörðun að fara frá gaurnum og er heil á ný og allt það. You go girl! í blómálfakjólnum…
Ég hugsa að María komist langt í keppninni og endi jafnvel í einvígi. Þó lagið heilli mig ekki og sviðssetningin hafi verið út úr kú að mínu mati þá er ég það hrifin af söngkonunni að ég verð ekki svekkt ef lagið keppir í Vínarborg fyrir Íslands hönd. Ég er afar spennt að fá að sjá og heyra þetta í beinni með enskum texta.“

Elín Sif – Í kvöld
„Algerlega frá fyrstu hlustun uppáhalds lagið mitt í keppninni. Ég held svo mikið með Elínu Sif að mig verkjar. Þegar ég heyri þetta lag þá ferðast ég aftur í tímann að fyrsta vangadansinum mínum. Elín er svo sjarmerandi að það nær alveg frá sviðinu í gegnum sjónvarpsskjáinn og í stofur landsmanna. Hún segir mér sögu og ég fer með henni inn í þennan hlýja og ástríka heim sem hún hefur skapað. Svo mætir hún bara með gítarinn sinn „Ein Bisschen Frieden“ style og siglir í gegnum þetta eins og ekkert sé. Sviðssetningin í undanúrslitunum hæfðu lagi og flytjanda fullkomlega. Engin tilgerð, ekkert flúr, bara einlægni og mýkt. Bakröddin stóð sig vel og þær sungu vel saman stöllurnar en þær voru ekki fullkomlega samstilltar fyrri hluta lags, en mér fannst eins og bættist í öryggið eftir sem leið á lagið og seinni hluti þess hljómaði eins og karamellur, jarðaber og játningar á bleiku skýi.
Ég vona að landinn muni heillast með mér og Elín Sif komast í einvígið. Ég hlakka svo mikið til að heyra enska textann á laugardaginn! Það er mín ósk að þetta lag verði framlag okkar í Vínarborg og það myndi gleðja mig óstjórnlega mikið ef sú yrði raunin. Ég held að Elín Sif hafi alla burði til að heilla Evrópu (og Ástralíu) upp úr skónum!“

Friðrik Dór – Í síðasta skipti
„Heilalím ársins án efa. Lagið grípur og það er mjög vel samið. Fullt af klisjum en það böggar mig ekki. Ég vakna með þetta lag á heilanum og ég hef ekkert á móti því að það skuli dvelja þar við. Ég er síraulandi það og þekki fleiri sem eru í sömu stöðu. Friðrik Dór fer mjög vel með það en ég verð að viðurkenna að ég varð fyrir eilitlum vonbrigðum með flutninginn í undanúrslitum. Það var eins og hann ætti erfitt með hæstu nóturnar og reif í nokkrum sinnum en ok allt í lagi með það. Ég hreifst samt með, lagið er bara svo asskoti grípandi. Það minnir mig á gömlu 60’s gullmolana þar sem textinn fékk að njóta sín og honum var haldið uppi með grípandi og eftirminnilegri laglínu. Vel gert!
Þetta er næstsíðasta lag úrslitakvöldsins og það hlýtur að vera príma staðsetning. Elín Sif hitar upp með ljúfum ástartónum og ástarsorginni rignir yfir þegar Friðrik Dór mætir á svið. Ég trúi ekki öðru en að þetta lag muni fara í einvígi og það kæmi mér ekkert á óvart ef það myndi sigra. Ég myndi ekkert fara í fýlu ef það væri niðurstaðan.“

Haukur Heiðar – Milljón augnablik
„Píanóið og takturinn eiga þetta lag. Haukur Heiðar fellur dáldið í skuggann af undirspilinu, sérstaklega fyrri partinn. Þetta minnir mig mikið á „How to Train your Dragon“ lagið hans Jónsa en takturinn er sá sami. Það er skemmtilegur léttleiki yfir því og ævintýralegur blær sem heillar mann með. En kannski eru það áhrifin frá fyrrnefndu teiknimyndinni. Finnst eins og ég sé að fljúga um loftin blá eitthvað að kanna og tengjast barninu í mér. Ég sakna þess eilítið að Haukur fái ekki að blasta á háu tónunum eins og hann er þekktur fyrir. Það var eins og hann ætti erfitt með sönginn í undanúrslitum, það vantaði öryggið og styrkinn í röddina, en ég spyr mig hvort lagið liggi kannski of lágt fyrir hans raddsvið. Ég er ekkert síður að fatta stílíseringuna á honum og á erfitt með að tengja herforingjajakkann (eða hvað þetta er) við lagið. Þetta lag nær mér þó alltaf út á (eldhús)gólf því takturinn er einmitt svo grípandi.
Þetta er síðasta lagið sem fer á svið á úrslitakvöldinu en ég held samt sem áður að það sé ekki að fara að skora mjög hátt. Samkeppnin er einfaldlega of hörð.“

Möguleikar í úrslitum: Milljón augnablik

Haukur í undankeppninni á laugardaginn var. Mynd: mbl.is

Haukur í undankeppninni á laugardaginn var. Mynd: mbl.is

Síðastur á sviðið á lokakvöldi Söngvakeppninnar á laugardaginn verður Haukur Heiðar með Milljón augnablik. Hann var ekki kjörinn áfram í símakosningu heldur á wild-card-atkvæði dómnefndar.

Kostir:

  • Hressilegt lag sem lokar kvöldinu á góðan hátt.
  • Stemmingin í laginu minnir á Sigurrós sem er mjög góð tenging og píanólínan er nokkuð snjöll.
  • Haukur er þekktur flytjandi og hefur útgeislun á sviðinu.

Gallar:

  • Nokkuð ágengt lag.
  • Haukur á erfitt með að ná til áhorfenda í gegnum sjónvarpsskjáinn.
  • Atriðið er ekki nógu vel útfært fyrir sjónvarpsmyndavélarnar.

Möguleikar alls í Söngvakeppninni: Þrátt fyrir að lagið sé síðast á svið (sem telst vera gullið sæti) teljum við möguleika þess frekar litla í úrslitakeppninni. Lagið er nokkuð flókið og svolítið ágengt og eftir öll huggulegheitin á undan kann það að verða til þess að lagið fari í taugarnar á fólki. 

Möguleikar í Eurovision sjálfri: Möguleikarnir í stóru keppninni gætu orðið einhverjir þar sem Sigurrósar-effektinn höfðar til útlendinga (sem og líkurnar á tengslum við lag Jónsa Sticks and Stones). Engu að síður er lykillinn að ná í gegnum skjáinn til áhorfenda og Haukur þarf að bæta sig talsvert þar. Lagið er líka bara ekki verulega grípandi við fyrstu hlustun.  

Möguleikar í úrslitum: Í síðasta skipti

Friðrik Dór í Háskólabíói. Mynd: ruv.is

Friðrik Dór í Háskólabíói. Mynd: ruv.is

Næstsíðastur á sviðið á laugardaginn verður Friðrik Dór með ballöðuna sína, Í síðasta skipti. Hann var valinn áfram á fyrra undankvöldinu.

Kostir:

  • Grípandi laglína sem festist vel í minni – leikskólabörn syngja með!
  • Lagið er flutt af einlægni, svo mikið er víst.
  • Sviðsetning er einföld sem beinir athygli að laginu sjálfu.

Gallar:

  • Ekki hægt að stóla á öruggan flutning.
  • Endir lagsins kemur of snögglega og ekki endilega ljóst að lagið sé búið!
  • Ekki mæta í röndóttu í sjónvarpið!!!

Möguleikar alls í Söngvakeppninni: Hér höfum við dálítlar áhyggjur af enskunni. Fólk er ekki vant að heyra Frikka syngja á ensku og það gæti hljómar undarlega fyrir suma. Möguleikarnir verða þrátt fyrir allt að teljast verulegir, aðalega fyrir þær sakir að Frikki Dór er að flytja lagið. Hann er gríðarlega vinsæll í stórum hópum og er búinn að túra grunn- og framhaldsskólana.

Möguleikar í Eurovision sjálfri: Þar sem Frikki er hvorki þekktur í aðdáendaheimi Eurovision né almennt út fyrir landssteinana verður hann að ná að heilla marga til að ná langt í keppninni. Þar þarf einlægnin og ákveðin auðmýkt að vera til staðar en flutningurinn verður að vera 100% líka.

Möguleikar í úrslitum: Í kvöld/Dance Slow

Elín í Háskólabíói. Mynd: bleikt.is

Elín í Háskólabíói. Mynd: bleikt.is

Fimmta á svið á laugardaginn kemur verður Elin Sif með lagið sitt, Í kvöld/Dance Slow. Hún komst áfram á fyrra undankvöldinu og við skulum skoða möguleika hennar í úrslitunum.

Kostir:

  • Einlægur flutningur og fallegt lag.
  • Einföld sviðsetning sem heillar auðveldlega.
  • Lagið sker sig frá öðrum lögum í keppninni.

Gallar:

  • Kannski er lagið of einfalt.
  • Einhverjum kann að finnast Elín of ung fyrir stóra sviðið.
  • Textinn hefur farið e.t.v. farið fyrir brjóstið á þeim sem finnst þetta óviðeigandi fyrir svo unga stúlku.

Möguleikar alls í Söngvakeppninni: Fyrir undankeppnirnar var þetta eitt af þeim lögum sem voru líkleg til að verða svarti pétur í úrslitunum. Hins vegar flaug það áfram í símakosningu sem segir okkur að landanum líkaði lagið. Maður fer oft langt á einlægninni og ekki er ósennilegt að Elín blandi sér í toppbaráttuna.

Möguleikar í Eurovision sjálfri: Möguleikarnir eru kannski ekki sérlega miklir í stóru keppninni. Hún kann að komast áfram í úrlstin, veltur mikið á hversu seint Ísland er á svið í undankeppninni og hverskonar lög Elín mun keppa við. Það má kannski segja að framsetning minni örlítið á Önnu Bergendahl sem keppti fyrir Svíþjóð 2010. Margir spáðu henni mjög góðu gengi en hún sat svo eftir með sárt ennið í undankeppninni.