Yfirferð laga 2011 I

Nú þegar aðeins nokkrir dagar eru þar til Júróvísjon hefst er komið að því að líta yfir framlögin í keppninni í ár og setja fram okkar álit á þeim. Í ár, eins og í fyrra, verður hægt að kjósa eftir hvert og eitt lag og það gæti haft nokkur áhrif en við gerum okkar besta í spádómum

Fjallað verður um fimm framlög í einu og við hvert  framlag verða gefin tvö álit, annað frá Hildi og hitt frá Eyrúnu. Fjallað verður um framlögin í þeirri röð sem þau stíga svið.

Í þessari fyrstu yfirferð verður því farið yfir framlög Póllands, Noregs, Albaníu, Armeníu og Tyrklands.

Pólland – Jestem í flutningi Magdalenu Tul

Eyrún segir: Pólland er dálítið eyland í keppninni þrátt fyrir að vera staðsett nákvæmlega í miðri Evrópu. Besti árangurinn náðist með 2. sæti þegar Edyta Górniak söng To Nie Ja árið 1994 en síðan þá hafa Pólverjar aðeins nokkrum sinnum náð í topp 10 og, eftir að forkeppnafyrirkomulagið var tekið upp, aðeins einu sinni náð að komast í aðalkeppnina (2008 með Isis Gee og For Life). Í fyrra sendu Pólverjar angurværa ballöðu flutta af karlmanni en nú tefla þeir fram poppsöngkonunni Mögdu sem hefur reynt fyrir sér í söngleikjum og fleiru heima fyrir. Lagið er frekar týpísk popp en ég dáist að því að það er flutt á pólsku – það gefur því alveg nýja vídd og flatneskjan verður ekki eins mikil! Það átti að setja enskan texta við lagið en pólskir aðdáendur þvertóku fyrir það og söfnuðu undirskriftum gegn því – og fengu í gegn að lagið verður flutt á pólsku! Húrra fyrir því! Ég fæ þetta lag ítrekað á heilann og held að keppnin byrji vel og skemmtilega á því en ég hef þó enga trú á því að það komi Póllandi í úrslit fremur en undanfarin ár.

Hildur segir: Pólverjar bjóða upp á júrópopp/klúbbalag í ár sungið á móðurmálinu. Það kemur lítið á óvart í laginu, allt er eftir bókinni. Það er þó svolítið eins og Magdalena hafi ekki haft nennu í að semja nema hálft lag því að eftir rúma mínútu hættir maður að nenna að hlusta því að lagið er alltaf eins. Pólverjar hafa ekki riðið feitum hesti frá þessari keppni og ég spái því að Pólverjar sitji eftir í þetta skiptið.

Noregur – Haba Haba í flutningi Stellu Mwangi

Eyrún segir: Noregur fór fremur óhefðbundna leið í ár og valdi sem framlag unga hiphop-söngkonu ættaða frá Keníu. Saga hennar er ævintýri líkust því að hún hefur lengi strögglað við að koma sér á framfæri. Hún fékk síðan hugljómun þegar hún kvartaði einu sinni við ömmu sína í Kenía yfir slæmu gengi. Þá á gamla konan að hafa sagt við hana: „Haba haba, Hujaza Kibaba“ sem á Swahili þýðir að litlu skrefin í lífinu geri mann hamingjusaman. Stella skellti þessu í lag sem vann í norsku undankeppninni með yfirburðum. Atriðið er ekta Eurovision-sjónvarp þrátt fyrir að lagið sjálft sé ekkert beysið. Vegna þess að Eurovision er fyrst og fremst sjónvarpskeppni spái ég Noregi nokkuð öruggu sæti í úrslitunum.

Hildur segir: Ég var bara engan veginn að fíla þetta lag þegar ég heyrði það fyrst. Laglínan er undarleg og Stella virðist bara ekki ráða alveg við að syngja hana á spennandi hátt. Viðlagið er hins vegar grípandi og sagan bakvið textann og lagið er einlæg. Í heildina er því eitthvað heillandi og einlægt við lagið og í því er mikil gleði og stemmning og viðlagið geta allir sungið. Ég spá því Stellu áfram og að hún lendi í topp 10 í aðalkeppninni.

Albanía – Feel the Passion í flutningi Aurelu Gaçe

Eyrún segir: Ég heyrði lagið fyrst með albönskum texta og ég get eiginlega ekki sagt að enski textinn hjálpi mikið! Þetta er hreinlega lagið sem ég gleymi alltaf! Albanir hafa undanfarin þrjú ár flogið upp úr undankeppnunum en verið svo í kringum 16. sætið í lokakeppninni. Ég ímynda mér að e-ð svipað komi til með að eiga sér stað núna (þar sem nágrannaböndin eru sterk) en þetta lag á ekki eftir að gera neina gloríur í aðalkeppninni.

Hildur segir: Ég er mikill aðdáandi Albaníu í keppninni og bíð alltaf spennt eftir að heyra framlög þeirra. Í ár varð ég þó fyrir vonbrigðum. Lagið er alltof lengi að komast inn í viðlagið (góð ein mínúta!) og svo þegar það loksins kemur þá er það hundleiðinlegt og það hljómar stundum eins og Aurela sé að æpa þegar hún syngur það og það gæti komið mjög illa út á sviðinu. Af því mér þykir þetta lag svo afskaplega leiðinlegt þá bara get ég ekki annað en spáð því að það sitji eftir.

Armenía – Boom Boom í flutningi Emmy

Eyrún segir: Fyrsta lagið á svið með bulltexta sem á að höfða til fólks – og fá það til að syngja með. Ég held að það sé varla nokkur vafi á því að Armenía komist áfram – þeir hafa alltaf verið í topp 10 í lokakeppninni. Lagið höfðaði strax dálítið til mín en við nánari hlustun finnst mér eins og það vanti dálítið botninn í það – en framkoman á sviðinu á klárlega eftir að bæta það upp. Hef fulla trú á Armeníu í ár!

Hildur segir: Armenar hafa löngum átt góðu gengi að fagna í þessari keppni og oft sent lög sem eru alveg þess virði að komast áfram.  Ég er ekki alveg viss um að framlag þeirra í ár sé þess virði að komast áfram en ég er þó handviss um að Boom Boom komist áfram. Það er bara eitthvað svo skemmtilega hallærislegt og jafnvel barnalegt við lagið og flutninginn að það er ekki hægt annað en að vera hress og syngja boom boom með og kjósa svo!

Tyrkland – Live It Up í flutningi Yüksek Sadakat

Eyrún segir: Þetta er lag sem ég fæ alltaf kjánahroll yfir! Klárlega næntísógeð eins og Dr. Gunni minntist á – en mér finnst það eins og þemalag í lélegum amerískum unglingaþáttum! Húff… ein hlustun er sannarlega nóg fyrir mig! En vissulega komast Tyrkir upp úr undankeppninni eins og venjulega, sama hversu gott/vont lagið er!

Hildur segir: Tyrkir hafa oft sent allskonar rokk í þessa keppni og náðu til dæmis alla leið í 2. sætið í fyrra með rokkinu sínu. Í ár er rokkið í anda Bon Jovi og fleiri amerískra næntís rokkara sungið af hljómsveitinni Yüsek Sadakat sem er vinsæl í heimalandinu. Lagið er merkilega grípandi og ákveðin stemmning í því þó að það bjóði ekki upp á neitt nýtt. Það er í raun kunnuglegt og það veitir nú oft á gott í Júróvísjon. Tyrkir eru ein af þeim þjóðum sem bara komast alltaf áfram í keppninni og í ár verður engin undanteking þar á.

Vinir Sjonna í nærmynd: Gunni

Næstur í röðinni í yfirferð okkar um Vini Sjonna er sjálfur Gunnar Ólason, betur þekktur sem Gunni Óla. Gunni mun munda gítarinn á sviðinu í Düsseldorf og er samkvæmt frétt eurovision.tv. slæmi strákurinn eða the bad boy, í hópnum.

Eins og margir vita þá kemur Gunni frá Selfossi og er líklega þekktastur fyrir að vera einn af stofnendum hinnar alræmdu sveitaballahljómsveitar Skítamórals. Gunni er ekki bara forsöngvari hljómsveitarinnar heldur hefur hann samið fjöldan allan af lögum fyrir sveitina. Skítamórall gerði einkum garðinn frægan á 10. áratugnum og var ein allra vinsælasta hljómsveit landsins og átti fjölda þekktra slagara en líklega er lagið Farinn þeirra allra þekktasta og vinsælasta. Hljómsveitin lagði upp laupana í upphafi 21. aldarinnar en kom aftur saman árið 2002 og hefur síðna þá spilað öðru hvoru við góðar undirtektir.

Gunni hefur tekið sér ýmislegt annað fyrir hendur á sínum tónlistarferli en koma fram með Skítamóral. Gunni á til að mynda eitt af vinsælli jólalögum landsins, Komdu um jólin. Gunni hefur einnig, eins allir júróvísjon aðdáendur vita, tekið þátt í Júróvísjon fyrir hönd Íslands. Það var árið 2001 þegar hann, ásamt Kristjáni Gíslasyni, kom fram sem bandið Two Tricky og fluttu lagið Angel eftir Einar Bárðarson. Lagið náði nú ekki góðum árangri í keppninni en lagið og Gunni og Kristján eru þrátt fyrir það þekktir í júróvísjonaáðdáendaheiminum. Gunni kom einnig fram með Sjonna í Söngvakeppni sjónvarpsins árið 2010 í laginu Waterslide. Gunni kom oft fram með Sjonna við ýmis tækifæri en saman spiluðu þeir lög úr öllum áttum á gítar og sungu m.a. á Hverfisbarnum á fimmtudagskvöldum.

Í stuttu spjalli við Allt um Júróvísjon sagði Gunni að hann gæti ekki gert upp við sig hvað væri eftirminnilegast á ferlinum því svo margt væri í uppáhaldi en nefndi þó að hann hefði haft mjög gaman að því að taka þátt í Júróvísjon árið 2001. Uppáhalds júróvísjonlag Gunna er þó ekki úr þeirri keppni heldur frá árinu 2005 en það er lagið In my dreams með norsku glysrokksveitinni Wig Wam. Það lag á vel við lýsingu Gunna á Júróvísjon en hann segir keppnina vera hressandi, skemmtilega og fagmannlega. Að lokum sagðist Gunni hlakka til að koma fram fyrir Íslands hönd í minningu góðs vinar ásamt því að komast aðeins í sumarið í Düsseldorf og eiga góðar stundir með vinum sínum.

Vinir Sjonna í nærmynd: Hreimur

Til að kynnast Vinum Sjonna örlítið nánar ákváðum við hér á Öllu um Júróvísjon að grennslast aðeins fyrir um hverjir þessir menn væru og hvað þeir hefðu gert áður í tónlistabransanum og fórum því á stúfana um netið og settum saman smá upplýsingar um þá auk þess sem við áttum stutt spjall við hvern og einn þeirra. Fyrstur í röðinni í þessari yfirferð okkar er Hreimur Örn Heimisson.

Hreimur mun munda bassann á sviðinu í Düsseldorf í vor og er samkvæmt eurovision.tv sá einlægi og saklausi í hópnum.  Hreimur er fæddur 1. júlí 1978 og eyddi barnæsku sinnir í Rangárvallasýslunni.  Árið 1997 stofnaði hann ásamt félögum sínum hljómsveitina Land og Syni og varð upp frá því heimþekktur á Íslandi. Land og Synir nutu mikilla vinsælda við lok 10. áratugarins og fram á fyrstu ár 21. aldarinnar og seldu plötur og spiluðu á böllum eins og enginn væri morgundagurinn. Land og synir reyndu fyrir sér í Ameríku í kringum aldarmótin 2000. Þegar ekkert hafði gengið um tíma í Ameríku þreifingunum var Hreimur sendur út til að kippa í spotta. Hreimi tókst að heilla bransakallana í Ameríku upp úr skónum og eftir stóðu Land og synir með 6 plötu samning í Ameríku.

Hreimur hefur einnig spilað og skemmt sjálfur víða í gegnum tíðina. Hann hefur til dæmis sungið barnalög inn á plötur og söng eitt lag í kvikmyndinni Gemsar. Hreimur kom stundum fram með Sjonna, til dæmis á fimmtudögum á Hverfisbarnum þar sem Sjonni spilaði og skemmti lengi. Auk þess hefur Hreimur fjórum sinnum tekið þátt í Söngvakeppni Sjónvarpsins. Lögin Þú, Mig dreymdi lítin draum og Draumur söng hann einn og svo kom hann fram með Sjonna þegar hann flutti Waterslide í keppninn árið 2010.

Mynd: visir.is

Hreimur er einnig orðin óaðskiljanlegur hluti Þjóðhátíðar í Vestmannaeyjum en eitt allra vinsælasta þjóðhátíðarlag seinni tíma, Lífið er yndislegt frá árinu 2001,  er eftir hann. Hreimur samdi einnig þjóðhátíðarlag ársins 2002, Vinátta, ásamt hljómsveit sem kallaðist Lundakvartettinn. Síðan þá hefur Hreimur samið þjóðhátíðarlagið tvisvar, árin 2005 og 2008. Árið 2005 var hann sérstaklega beðin um að semja lag hátíðarinnar enda þótti ekkert lag sem send voru inn í keppnina um Þjóðhátíðarlagið nægilega gott. Árið 2008 samdi Hreimur svo þjóðhátíðarlagið Brim og boðaföll. Í stuttu samtali við Allt um Júróvísjon sagði Hreimur að eftirminnilegasta stundin á ferli sínum hafi einmitt verið þegar fyrsta þjóðhátíðarlagið hans, Lífið er yndislegt, var frumflutt á Þjóðhátið 2001.

Aðspurður um uppáhalds júróvísjonlag segir Hreimur það ekki vera neina spurningu, það sé lagið Wild dances sem Ruslana kom sá og sigraði með árið 2004. Það er mikið stemmnings lag og á vel við því þegar Hreimur var beðin um að lýsa Júróvísjon í þremur orðum sagði hann: ,,stuð og stemmning“. Allt um Júróvísjon spurði Hreim um hvaða væntingar hann hefði til Düsseldorf ævintýrisins og sagðist hann gera sér væntingar um að komast upp úr undankeppninni og lenda vonandi í efrihluta tölfunar. Að lokum sagðist Hreimur hlakka mest til þess að vera með hluta af sínum nánustu vinum í Düsseldorf og flytja lag Sjonna og Þórunnar og bætti við að  hann vonaðist líka til að komast aðeins golf :o).

 

Veðbankaspár 2 vikum fyrir keppni!

Nú líður heldur betur að keppninni… aðeins 14 dagar í fyrri undanriðilinn þegar Vinir Sjonna stíga á svið!

Það er því heldur betur tími til kominn að líta á veðbankaspárnar eins og sakir standa í dag:

Veðbanki	1. sæti	2. sæti	3. sæti	4. sæti	5. sæti
Oddschecker.com	Frakkland 7/2	Eistland 15/2	Bretland 7	Svíþjóð 9	Ungverjaland 11
Online Betting Guide.co.uk	Frakkland 5	Eistland 8	Bretland 9	Svíþjóð 11	Ungverjaland 13
Paddypower.com	Frakkland 7/2	Eistland 7/1	Bretland 7/1	Svíþjóð 8/1	Ungverjaland 11/1
Eurovisionbetting.com	Frakkland 4	Eistland 7	Bretland 7	Svíþjóð 9	Ungverjaland 11
William Hill	Frakkland 7/2	Eistland 7/1	Bretland 7/1	Azerbaídjan 10/1	Ungverjaland 10/1
ESC stats.com	Ungverjaland	Bretland	Frakkland	Eistland	Svíþjóð
Esctoday.com	Svíþjóð 126	Frakkland 124	Ungverjaland 123	Bretland 120	Eistland 79
Nicerodds.co.uk	Frakkland	Eistland	Þýskaland	Bretland	Noregur

Hérna sést að það eru nokkurn veginn sömu löndin sem skipa efstu fimm sætin. Áhugavert er að af þeim fimm eru tvær stórþjóðir sem verður að teljast til tíðinda, sem og Ungverjaland sem snýr aftur í keppnina eftir nokkurt hlé (og sem gárungarnir segja að eigi enga vini í keppninni!)

En hefur staðan mikið breyst fyrir Ísland? Nei, það er ekki að sjá að spárnar hafi tekið mikið við sér:

Veðbanki	Sæti Íslands
Oddschecker.com	27. sæti
Eurovision-betting.com	27. sæti
Paddypower.com	34. sæti
Online Betting Guide.co.uk	27. sæti
William Hill	23. sæti
Esctoday.com	27. sæti
ESC stats.com	36. sæti
Nicerodds.co.uk	27. sæti

Við getum því búið okkur undir spennandi daga á næstunni.

Fylgist með okkur því að við munum fara að birta okkar spár og spekúlasjónir um lögin og löndin. Ekki missa af þeim!

Staðan eftir tvo „Alla leið“-þætti … og staðan í OGAE-kosningu!

Það hefur vonandi ekki farið fram hjá neinum aðdáanda keppninnar að þættirnir hans Palla, Alla leið, eru byrjaðir á RÚV.

Þeir eru sýndir á laugardagskvöldum fram að keppni kl. 19:40 og eru því þrír þættir eftir.

EKKI MISSA AF HONUM Í KVÖLD! 🙂 Hina þættina má nálgast á vef RÚV hér.

Er þá ekki rétt að fara örlítið yfir stöðuna hjá þeim Palla, Reyni, Guðrúnu og dr. Gunna? Eins og þið vitið fara þau yfir lögin í þeirri röð sem þau stíga á svið og gefa þeim grænt ljós eða rautt eftir því hvort þau telja að þau haldi áfram í keppninni eður ei.

Í fyrsta þættinum voru þau frekar jákvæð en neikvæð í þeim næsta.

Svona lítur þetta þá út eftir 2 þætti:

Grænt	Rautt
Pólland	Sviss
Noregur	Georgía
Albanía	Finnland
Armenía	Malta
Tyrkland	San Marínó
Serbía	Króatía
Rússland
Ísland
Ungverjaland

Enn sem komið er hafa spekingarnir íslensku verið fremur jákvæðir og fljótt á litið getum við nú verið nokkuð sammála þeim. Þau voru reyndar ekkert svakalega sannspá í fyrra – Palli var þeirra hlutskarpastur þegar hann spáði Rúmeníu sigri (lentu í 3. sæti). Guðrún spáði Danmörku sigri (lenti í 4. sæti) en Reynir og dr. Gunni spáðu Frakklandi sigri (12. sæti) og Lettlandi (komst ekki upp úr undankeppninni).  En þetta skýrist þó þegar líður nær keppninni.

Það var reyndar dálítið sérstakt að þau skyldu taka það fram að í fyrra hafi „enginn klár sigurvegari verið“ því að spár veðbanka, aðdáenda og vinsældir þýska lagsins voru mjög áberandi frá upphafi…  og við spáðum Lenu sigri 🙂

Það er líka gaman að líta aðeins á hvernig aðdáendaklúbbarnir hafa verið að kjósa en á síðunni esctoday.com er á hverju ári kosning um uppáhaldslög aðdáenda. Þau lönd sem ekki eru á listanum hafa enn ekki fengið stig – takið eftir því að Ísland er þarna komið á blað! 🙂

Svona leit sá listi út í gær (22.04):

OGAE 2011 Complete Lineup (af http://www.esctoday.com)

1	Frakkland	118
2	Bretland	115
3	Svíþjóð	114
4	Ungverjaland	113
5	Eistland	79
6	Azerbaídjan	59
7	Bosnía Hersegóvína	55
8	Danmörk	28
9	Noregur	23
	Rússland	23
11	Þýskaland	21
12	Pólland	20
13	Austurríki	17
14	Rúmenía	16
15	Ísrael	13
16	Grikkland	9
	Írland	9
	Ítalía	9
19	Búlgaría	4
	Kýpur	4
	Spánn	4
	Sviss	4
	Úkraína	4
24	Serbía	3
25	Ísland	2
	Holland	2
25	Georgía	1
	San Marinó	1

Keppni bullorðanna?

Það hafa verið nokkðu skiptar skoðanir á gæði laganna sem keppa í júróvísjon í ár. Margir hafa sagt að keppni sé slök og fá góð lög muni verða flutt á sviðinu í Düsseldorf. Hverju sem líður gæði laganna þá virðist gæði sumra textanna ekki vera upp á marga fiska eða að minnsta kosti sum viðlögin! Heil fjögur lög í keppninni í ár heita bullorðum þó þau sé ekki alvarið á uppgerðu tungumáli eins og stundum hefur verið raunin í júróvísjon!

Fyrst á svið með bullorðaviðlag er hin norska Stella Mwangi en hún er önnur á svið í fyrri undankeppninn þann 10. maí n.k. Stella flytur lagið Haba haba sem er afar hress smellur!

Næsta bullorðaviðlag er í framlagi Armena. Emmy syngur lagið Boom Boom fyrir hönd þjóðar sinnar og er ekki nóg með að hún syngi Boom Boom heldur bætir hún við chaka chaka og lætur það við  like a like a! Algjör snilldar texti hér á ferð!!

Finnar eru næstir í röðinni í bullorðaviðlagakeppninni en Paradise Oscar stígur á svið ellefti í röðinni á fyrra undanúrslitakvöldið og syngur lagið Da da dam en viðlagið í því lagi heldur áfram darararmm og svo framvegis!

Síðasta bullorðaviðlagið í ár er flutt af engri annarri en Dönu International! Hún stígur á stokk númer 12 á seinna undanúrslitakvöldinu þann 12. maí og flytur þar lagið Ding dong. Nú er spruning hvort Ding dong fleytir henni jafnlangt og Diva!

Gamalt uppáhalds: Video Video

Árið 1982, þegar Þjóðverjar sigruðu Júróvísjon í fyrsta skipti, sendu Danir grúbbuna Brixx í keppnina með lagið Video Video. Ekki er miklar upplýsingar að finna um þetta band í netheiminum en það skiptir ekki öllu máli því lagið er algjör gullmoli í júróvísjon sögunni! Gengi lagsins var þó afar slappt og rétt náði í 5 stig og endaði í næst síðasta sæti á eftir Finnlandi sem fékk ekkert stig þetta árið. Þrátt fyrir það hefur lagið lifað áfram og er eitt allra vinsælasta júróvísjonlagið í Danmörku og má heyra það amk einu sinni á hverju kvöldi á karíókí börum Kaupmannahafnar!

Atriði Brixx liða var ekki til að hrópa húrra fyrir en búningarnir voru dásamlegir. Forsöngvarinn í bandinu, Jens Brixtofte, klæddist gulum jakka og bleikum skóm við bleikt lakkrísbindi og allt of stóra skyrtu meðan bassaleikarinn klæddist allt of þröngum gullbuxum við þrönga glansandi bláa skyrtu! Allt þetta ásamt dásmlegum texta um mann sem hefur eignast hina frábæru nýju tækni, videotækið, og gerir ekkert annað allan liðlangan daginn en að horfa á video!

Þýskaland í Júróvísjon!

Í ljósi þess að júróvísjon í ár er í Þýskalandi finnst okkur ekki úr vegi að fjalla aðeins um sögu Þýskalands í Júróvísjon!

Þýskaland er eitt af þeim löndum sem tóku þátt í fyrstu júróvísjon keppninni árið 1956 í Lugano í Sviss. Í þeirri keppni tóku sjö lönd þátt og hvert land átti tvö lög í keppninni. Fulltrúar Þýskalands þetta árið voru Walter Anderas Schwarz með lagið Im Wartesaal Zum Grossen Glück og Freddy Quinn með lagið So geth das jede Nacht. Ekki er vitað mikið um hvernig kosning fór í þessari fyrstu keppni en upplýsingar um stig er ekki að finna og einungis var gefið upp fyrsta sætið en það hlaut Sviss eins og flestir júróvísjon aðdáendur vita!

Allt frá því 1956 hefur Þýskaland tekið þátt í öllum keppnum nema einni, árið 1996, sem veitir Þýskalandi þann titil að hafa keppt oftast allra landa í Júróvísjon. Þrátt fyrir það hefur Þýskaland einungis tvisvar unnið keppnina ólíkt bæði Frökkum og Bretum sem hafa unnið nokkuð oftar þrátt fyrir að hafa tekið þátt í færri skipti. Þýskaland vann fyrst árið 1982 með laginu Ein bisschen Frieden í flutningi Nicole. Í hugum margra júróvísjon aðdáenda er lagið eitt af þeim betri sem komið hefur fram í Júróvísjon og flutningurinn hjá Nicole þótti líka eftirtektaverður. Og svo eins og kunnugt er sigraði hin unga Lena keppnina í Osló í fyrra heldur örugglega með laginu Satellite. Þjóðverjar hafa þó nokkuð oft lent ofarlega í keppninn en samtals 9 sinnum hafa þeir lent í 2. eða 3. sæti og samtals 30. sinnum í topp 10 og verður það að teljast ágætur árangur. Þjóðverjar hefur þó alls ekki alltaf gengið vel og hafa þeir hlotið þann vafasama heiður að hafa 9 sinnum hlotið 5 stig eða færri í keppninni og þar af tvisvar sinnum núll stig!!

Þó að Þjóðverjar hafi ekki verið með árið 1996 var það ekki að þeirra eigin frumkvæði og hafa þeir því ætlað sér að taka þátt öll 56 skiptin sem Júróvísjon hefur verið haldin. Þetta ár tók EBU (Evrópska sjónvarpsbandalagið) upp forval í keppnina til að taka á þeim mikla fjölda sem nú sóttist eftir þátttöku. Einungis Norðmenn, gestgjafar og sigurvegarar ársins 1995, fengu sjálfkrafa þátttökurétt og þurftu því hin löndin 29 sem vildu vera með að fara í forval. Niðurstaða forvalsins var sú að Þýskaland komst ekki áfram og sat því eftir heima.  Þetta olli nokkrum taugatitringi hjá þýska ríkissjónvarpinu sem og EBU sökum þess að Þýskaland greiddi mest til keppninar á þessum tíma. Þessu fyrirkomulagi var því hætt og árið eftir var Þýskaland með að nýju. Þjóðverjar teljast nú til hinnar fimm stóru þjóða í Júróvísjon sem eiga alltaf öruggt sæti í úrslitakeppninni en ásamt þeim eru Bretar, Frakkar, Spánverjar og Ítalir í þeim hópi.

Þjóðverjar eiga talsvert af eftirminnilegum lögum í Júróvísjon. Vinningslögin þeirra tvö eru að sjálfsögðu eftirminnileg auk lagsins Für alle með hljómsveitinni Wind sem þegar hefur verið fjallað um hér á síðunni. Einnig höfum við fjallað um lagið Dschinghis Kahn sem lenti í 4. sæti árið 1979 og var heldur betur líflegt sem og lagið Reise nach Jerusalem frá árinu 1999 sem við höfum nýlega fjallað um hér á síðunni. Framlag Þjóverja árið 2006 vakti líka athygli en þá telfdu þeir fram kántrí hjómsveit og söngkonu í afar bleikum kjól og saman fluttu þau lagið No no never. Í örvæntingu sinni til að ná góðum árangri í keppninni árið 2009 telfdu Þjóðverjar fram hinni vafasömu burlesque dömu, Ditu von Teese sem dansar í laginu Miss kiss kiss bang með dúetnum Alex Swings Oscar Sings en báru ekki  árangur sem erfiði. Þjóðverjar hafa einnig sent minna eftirminnileg lög í keppnina og má sjá nokkur þeirra hér að neðan!

Þjóðverjar hafa verið nokkuð iðnir við að senda sömu flytjendur aftur í keppnina og er Lena alls ekki sú eina sem stígur aftur á svið fyrir hönd Þjóðverja! Við höfum áður fjallað um hljómsveitina Wind sem tók þrisvar sinnum átt fyrir hönd Þjóðverja. Katja Ebstein tók einnig þátt þrisvar sinnum fyrir hönd Þjóðverja árin 1970, 1971 og 1980 og gekk nokkuð vel, lenti í tvisvar í 3.sæti og einu sinni í 2.sæti. Leik- og söngkonan Margot Hielscher tók þátt tvisvar, árin 1957 og 1958 og lenti í 4. og 7. sæti.

Saga Þjóðverjar er því nokkuð skrautleg í Júróvísjon eins og vænta má af þjóð sem hefur tekið 55. sinnum þátt! Í lokin má lítla nokkur af framlögum Þjóðverja í 56 ára sögu þeirra í Júróvísjon.

Framlag Þjóðverja 1969 – Siw Malmkvist og lagið Primaballerina

Framlag Þjóðverja 1980 – Katja Ebstein og lagið Theater

Framlag Þjóðerja 1995 – Stone & Stone og lagið Verliebt in Dich

Framlag Þjóðverja 2003 – Lou með lagið Lets get happy

Að breyta fótboltavelli í sjónvarpstúdíó

(mynd: Sylvia Galaschek)

Eins og fram hefur komið þá mun Júróvísjon keppnin verða haldin í Esprit íþróttahöllinni í Düsseldorf en hún er staðsett við Rín í Stockum hverfinu. Þrátt fyrir að Esprit höllin sé fjölnota hús þarf mikill undirbúningur að fara fram áður en hægt er að halda Júróvísjon! Esprit-höllin, sem raunar hét LTU höllin allt til ársins 2009, var byggð á árunum 2002-2004 og var opnuð formlega í uppphafi árs 2005. Höllin er gríðarstór, rúmir 7000 fermetrar að flatarmáli og hefur leyfi til að hýsa 66.500 gesti. Höllin er í raun fótboltavöllur og er heimavöllur fótboltaliðsins Fortuna.

Leiðin frá því að breyta fótboltavelli í sjónvarpstúdíó er löng og hófst því vinna við að standsetja höllina fyrir júróvísjon í byrjun apríl. Það sem raunar verður gert er að fótboltavöllurinn (40 sentimetra þykkur grasflötur) verður fjarlægður og í staðinn settur sandur á völlinn og viðargólf lagt yfir. Þegar því er lokið getur vinnan við annað í höllinni hafist.

(mynd: eurovision.tv)

Sviðið, sem verður næstum því kringlótt, er hannað af Florian Wieder og munu áhorfendurnir 35.000 sitja næstum því hringinn í kringum það. Sviðið  er að mestu leyti búið til af sviðshönnuðum NDR í Hamborg. Sviðsbúnaðurinn er rúmlega 1500 tonn að þyngd og verður fluttur til Düsseldorf í 40 vöruflutningabílum.  Það er þó bara brot af þeim búnaði sem þarf að flytja í höllina en samtals verður fluttur í höllina búnaður (ljósa, hljóð, rafmagns og LED búnaður) sem vegur rúmlega 4500 tonn og mun koma þangað í 120 vöruflutningabílum. Í þessum búnaði er meðal annars að finna 35 kílómetra af rafmagnssnúrum og 90 hljóðnema og head sets.

Til viðbótar við höllina verða 80 kofar fyrir utan höllina sem munu hýsa tæknibúðnað og vera aðstaða fyrir tæknimenn og hópinn sem er ábyrgur fyrir símakosningunni. Auk þess verður gríðarstórt svæði við hliðina á höllinni fyrir blaðamenn en búist er við um 2500 blaðamönnum frá öllum 43 þátttökulöndunum meðan á keppninni stendur.

Ef þig langar að vita meira um höllina geturðu skoðað heima síðu hennar, http://www.espritarena.de, og hér er geturðu séð video af höllinni!

Gamalt uppáhalds: Reise nach Jerusalem

Júróvísjonkeppnin árið 1999 er sannarlega eftirminnileg íslenskum júróvísjon aðdáendum. Selma Björnsdóttir var þá í harðri samkeppni við hina sænsku Charlotte (þá) Nilson um vinnigssætið í keppninni sem endaði með því að Charlotte vann og skildi Selmu eftir með annað sætið, besta árangur Íslendinga í keppninni til þessa. Það sem ábyggilega færri muna eftir er framlag Þjóðverja í þessari keppni.

Lagið Reise nach Jerusalem eða Ferðin til Jerúsalem var flutt af þýsk-tryknesku grúbbunni Sürpriz sem var stofnuð eingöngu til að flytja lag í undankeppninni heima í Þýskalandi. Keppnin var þetta ár haldin í Jerúsalem og það má sem sanni segja að leið Þjóðverja til Jerúsalem það ár hafi ekki verið auðveld. Í undankeppninni heima fyrir, sem var haldin í Bremen, lenti Sürpriz í öðru sæti en sigurlagið, Hör den Kindern einfach zu (Hlustið einfaldlega á börnin), var dæmt óhæft til þátttöku þar sem það hafði komið út tveim árum áður með öðrum flytjanda. Sürpriz var því boðið að fara sem framlag Þjóðverja í keppnina. Sú ákvörðun olli hins vegar líka umtali í Þýskalandi og sögðu margir að lagið líktist of mikið öðru lagi eftir sama höfund (Ralph Siegler) sem kallast ,,Wo geht die Reise hin? (Hvert er ferðinni heitið?) sem kom út með hljómsveitinni Harmony Four árið 1984. Málið var tekið upp hjá Evrópska sjónvarspbandalaginu (EBU) og var niðurstaðan sú að Reise nach Jerusalem væri hæft til keppni.

Það voru fáir sem bjuggust við því að þau sex tyrkneskættuðu Þjóðverjar sem skipuðu bandið Sürpriz myndu ná langt í Jerúsalem. Eitthvað snertu þau þó við Evrópubúum þegar þau stigu á sviðið í náttfötunum til að flytja lagið því þau enduðu í 3. sæti einungis 6 stigum á eftir Selmu. Þetta var í 11. skipti sem Þjóðverjar lentu í 3. sæti eða ofar en síðan þá hafa þeir einungis einu sinn lent í efstu þremur sætunum en það var einmitt í fyrra þegar þeir sigruðu með laginu Setillte í flutningi hinnar umtöluðu Lenu.

Þrátt fyrir ágætan árangur í keppninni áttu Sürpriz ekki góðu gengi að fagna í kjölfarið. Lagið komst ekki á vinsældalista í Þýskalandi og lítill áhugi  var fyrir bandinu þar. Þau gáfu þó út eina plötu í Tyrklandi en salan og undirtekirnar voru dræmar. Bandið var því leyst upp árið 2002.

Hér má sjá lagið en það var flutt á ensku, þýsku, tryknesku og hebresku.